Stvorene su bile da dariju druge
a sad stare, suhe pomalo se kreću.
Kad gredu po kalah uz mir se daržidu
i pomalu gredu, gredu i šebeću.

Kad su divnje bile s materan su doma
ocu, braći, stanu svoju pomoć dale
uz vidrice, barve, kotlenke i žarna
i s brimenin teškin, ča su same brale.

U novemu stanu dale su iz sebe
živote i snagu, veseje i žalost;
nemoć dice, muža i njih je bolila,
snaga, zdravje dice bila jin je radost.

Sad zgarbjene, suhe, od brimen i trudih
u žepu traverse svej sobon imaju
krunice, mendule – da s molitvan martve,
s mendulin unuke male darivaju.

S tin ih sad darivaju, jer ne mogu s drugin
u jubavi sriću našle su najveću
a kad gredu vidit dice svoju dicu
uz mir se daržiju, gredu i šebeću.